මෙරට තේ නිෂ්පාදනය 20%කින් පහත වැටෙයි

රසායනික පොහොර තහනමේ බලපෑම සහ ආර්ථික අර්බුදය හේතුවෙන් මේ වසරේ මුල් මාස 4 තුළ මෙරට තේ නිෂ්පාදනය 20% කින් පහළ ගොස් වසර තුනක අවම අගය වන කිලෝග්‍රෑම් මිලියන 84 ක් දක්වා පහත වැටී ඇති බව වාර්තා වේ.

පසුගිය වසරේ මුලදී ඉවත් කර ඇති රසායනික පොහොර තහනම ක්‍රියාත්මක කළ නිසා තේ නිෂ්පාදනය 16% කින් පහත වැටීමට හේතු වී ඇති බව රජයේ දත්ත පෙන්වා දෙයි.

වැවිලිකරුවන්ගේ සංගමයේ මාධ්‍ය ප්‍රකාශක රොෂාන් රාජදුරෙයි පවසන්නේ අද වන විට අවශ්‍ය තරම් පොහොර වෙළෙඳපොළේ තිබුණත් මිල ඉතා ඉහළ මට්ටමක පවතින බවයි.

එමෙන්ම 2021 වසරේ රුපියල් 1500ක් වූ කිලෝග්‍රෑම් 50 පොහොර මිටියක් රුපියල් 20,000ක් වන අතර අනෙකුත් යෙදවුම්වල මිලද සිව් ගුණයකින් ඉහළ ගොස් ඇති බැවින් තේ නිෂ්පාදනය අඩුවී ඇති බවද ඔහු සඳහන් කරයි.

2023 වසර සඳහා අපනයන ආදායම ඩොලර් බිලියන 1.4 දක්වා ළඟා වනු ඇතැයි අපේක්ෂා කරන නමුත් ඒ සඳහා අවම වශයෙන් කිලෝග්‍රෑම් මිලියන 250ක් නිෂ්පාදනය කළ යුතු බව ඔහු වැඩිදුරටත් පැවසීය.