තෙල් සංස්ථා අධ්‍යක්ෂකගෙන් මානව හිමිකම් කොමිසමට ලිපියක්

පසුගිය 25 වනදා පැවති උසස් පෙළ සමයේ විදුලි කප්පාදුව සම්බන්ධයෙන් සාකච්ඡා කිරීම සදහා මානව හිමිකම් කොමිසම් කැඳවා තිබු සාකච්ඡාවට සහභාගි නොවූයේ නිවාස සංවර්ධන මුල්‍ය සංස්ථා බැංකු අධ්‍යක්ෂ මණ්ඩල රැස් වීමට එදින සහභාගිවීම හේතුවෙන් බව දන්වමින් ඛනිජ තෙල් නීතිගත සංස්ථාවේ කළමනාකාර අධ්‍යක්ෂවරයා මානව හිමිකම් කොමිෂන් සභාව වෙත ලිපියක් යොමුකර තිබේ.

කෙසේ වෙතත් ඛනිජ තෙල් නීතිගත සංස්ථාවේ නියෝජනය කරමින් සහභාගි වූ නිලධාරීන් සාකච්ඡාවේදී මතු කළ කරුණු සම්බන්ධයෙන් නිසි අවධානයක් යොමු නොවූ බවද ලිපියේ දක්වා තිබිණි. 

සාකච්ඡාවේදී මානව හිමිකම් කොමිසන් සභාවේ ඒකපාර්ශවීය මතය වෙත ඛනිජ තෙල් සංස්ථා නිලධාරීන්ගේ අනුමැතිය ලබාගත් බවට තම නිලධාරීන් වාර්තා කළ බවයි අධ්‍යක්ෂවරයා ලිපියෙන් පෙන්වා දුන්නේය.

මෙම අසාධාරණය හේතුවෙන් මානව හිමිකම් කොමිෂන් සභාවේ නිර්දේශය යළි සළකා බැලිය යුතු බවත් එම මහතා දන්වා තිබිණි. 

ආනයනික ඉන්ධනවලට වඩා අඩු පිරිවැයක් යටතේ දැවිතෙල් සහ නැප්තා නිකුත් කළ හැකි වුවද ඊට මුදල් නොලැබීම නිසා ණය පදනම මත දැනට පවතින තොග නිකුත් කිරීමෙන් ඉදිරියේදී පිරිපහදුව යළි අකර්මණ්‍ය වීමේ අවදානමක් ඇති බව අධ්‍යක්ෂවරයා දන්වා සිටියේය.

අද වනවිට විදුලිය සැපයීම සඳහා රුපියල් බිලියන 111ක වටිනාකමින් යුත් ඉන්ධන ලංකා විදුලිබල මණ්ඩලයට ලබා දී ඇති බවත් එම ලිපියේ සඳහන්.