කටුනායක ප්‍රභූ මගී පර්යන්තයේ ආරක්ෂාව වැඩි කිරීමට පියවර

කටුනායක ජාත්‍යන්තර ගුවන් තොටුපළේ ප්‍රභූ මගී පර්යන්තයේ අධි තාක්‍ෂණික ස්කෑන් යන්ත්‍ර සවි කිරීමට අවශ්‍ය පියවර ගන්නා ලෙස ජනාධිපති ලේකම් සමන් ඒකනායක මහතා රේගු අධ්‍යක්ෂ ජනරාල්වරයාට උපදෙස් දී ඇත.

කටුනායක ගුවන් තොටුපළේ සාමාන්‍ය මගී පර්යන්තයේ ගුවන් මගීන් රැගෙන එන ගමන් මලු පරීක්ෂා කිරීමට අධි තාක්ෂණික ස්කෑනිං යන්ත්‍ර තිබූ නමුත් ප්‍රභූ මගී පර්යන්තයේ එවැනි පහසුකම් නොමැති බව රේගු නිලධාරීන් ප්‍රකාශ කර තිබිණි.

මේ හේතුවෙන් විශේෂ මගී පර්යන්තය හරහා පැමිණෙන ප්‍රභූවරුන්ගේ ගමන් මලු පරීක්ෂා කිරීම සිදු නොවන බව රේගු නිලධාරීහු පවසති.

ප්‍රභූ පර්යන්තය හරහා නීතිවිරෝධී භාණ්ඩ රැගෙන ඒම වැළැක්වීම සඳහා ජනාධිපතිවරයාගේ උපදෙස් පරිදි විශේෂ මගීන්ට සහ ප්‍රභූවරුන්ටද පිටවීමේ පර්යන්තයේ මෙම උපකරණ සවි කරන ලෙස ජනාධිපති ලේකම්වරයා ශ්‍රී ලංකා රේගුවට දන්වා ඇත.