දකුණු අප්‍රිකාව ලංකාව අභිබවා ඉදිරියට

2023 එක්දින ලෝක කුසලාන ක්‍රිකට් තරගාවලිය සදහා එංගලන්තය සමග පැවැති දෙවැනි එක්දින ක්‍රිකට් තරගයෙන් ලැබූ කඩුලු 5ක විශිෂ්ඨ ජයත් සමග දකුණු අප්‍රිකා කණ්ඩායම එක්දින ලෝක කුසලානයට සෘජුව සුදුසුකම් ලැබීමේ සිය බලාපොරොත්තු තවදුරටත් ඉහළ මට්ටමකට රැගෙන ඒමට සමත් වුණා.

Bloemfontein හි පැවැති තරගයේ නායක ටෙම්බා බවුමා වාර්තා කළ සුපිරි ශතකයෙන් ශක්තිමත් වූ දකුණු අප්‍රිකා කණ්ඩායම එක්දින ඉතිහාසයේ දී දකුණු අප්‍රිකා කණ්ඩායමක් සාර්ථකව හඹා ගිය තෙවැනි ඉහළම ලකුණු සංඛ්‍යාව ද වාර්තා කරමින් ජය ගත්තේය.

තරගයේ පළමුව පන්දුවට පහරදුන් එංගලන්තය කඩුලු 7 ක් දැවී ලකුණු 342 ක් රැස් කළ අතර, පිළිතුරු ඉනිම ක්‍රීඩා කළ දකුණු අප්‍රිකාව ඉනිම නිමා වීමට පන්දු 5 ක් ඉතිරිව තිබියදී ජයග්‍රාහී ඉලක්කය පසු කළේ කඩුලු 5 ක් දැවී සිටියදීයි.

මේ වන විට තරග 3කින් යුත් එක්දින ක්‍රිකට් තරගාවලියේ පළමු තරග දෙකම ජය ගෙන ඇති දකුණු අප්‍රිකාව දැනටමත් පුර්ණ තරගාවලියම ජය ගෙන අවසන්.

මේ වන විට අයි.සී.සී ක්‍රිකට් ලෝක කුසලාන සුපර් ලීගයේ පළමු තරග දෙකෙන් ලැබූ ජයත් සමග ප්‍රසාද ලකුණු සටහනේ දකුණු අප්‍රිකා කණ්ඩායම අයර්ලන්තය හා ශ්‍රී ලංකාව අභිබවා යමින් 9 වැනි ස්ථානය දක්වා ඉදිරියට පැමිණ තිබෙනවා.

ශ්‍රී ලංකාවට ප්‍රසාද ලකුණු 77 ක් ද, අයර්ලන්තයට ප්‍රසාද ලකුණු 68 ක්ද,දකුණු අප්‍රිකාවට ප්‍රසාද ලකුණු 79 ක්ද හිමියි.