ලොව දුක්ඛිතම රටවල් අතරින් ශ්‍රී ලංකාව 11 වෙනි තැනට

ලෝකප්‍රකට ආර්ථික විශේෂඥයෙකු වන ස්ටීව් හෑන්ක් විසින් සකස් කළ 2022 වාර්ෂික දර්ශකයට අනුව ලොව දුක්ඛිතම රටවල් අතර ශ්‍රී ලංකාව 11 වන ස්ථානයට පත්ව තිබෙනවා.

මෙම දර්ශකයට රටවල් 157 ක් ඇතුලත් වන අතර ඒ අතරින් ලොව දුක්ඛිතම රට ලෙස නම් කර ඇත්තේ සිම්බාබ්වේ රාජ්‍යයි.

දෙවන ස්ථානය වෙනිසියුලාවටත්, තුන්වන ස්ථානය සිරියාවටත්, හතරවන ස්ථානය ලෙබනනයටත් හිමිව තිබෙනවා.

සුඩානය, ආර්ජන්ටිනාව, යේමනය, යුක්‍රේනය, කියුබාව සහ තුර්කිය පස්වන ස්ථානයේ සිට පිළිවෙලින් 10 වන ස්ථානය දක්වා පසුවනවා.

ශ්‍රී ලංකාව 11 වන ස්ථානයට නම් කිරීමට හේතුවී ඇත්තේ රට තුළ පැවති ඉහළ උද්ධමනයයි.

මෙම ශ්‍රේණිගත කිරීමට රටවල් ඇතුලත් කිරීමේදී විරැකියාව, උද්ධමනය, බැංකු ණය අනුපාත සහ දළ දේශීය නිෂ්පාදිතයේ වෙනස්කම් සලකා බලා තිබෙනවා.

ඒ අනුව 2022 වසරේ ශ්‍රී ලංකාවේ විරැකියාව 6.5% ක මට්ටමක පැවති බවත්, උද්ධමනය 57% ඉක්මවා ගොස් තිබූ බවත් ඒක පුද්ගල දළදේශීය නිෂ්පාදිතයේ වාර්ෂික ප්‍රතිශතය -9.3%ක් බවත් ශ්‍රී ලංකාවේ බැංකු ණය දීමේ අනුපාතය 20% ත් ඉක්මවා තිබූ බවත් ස්ටිව් හෑන්ක්ගේ වාර්තාවේ ඇතුලත්.

ලොව දුක්ඛිතම රටවල් වර්ගීකරණයේ ශ්‍රී ලංකාවට හිමි ලකුණු සංඛ්‍යාව 99.63 ක්.

ආර්ථික විශේෂඥ ස්ටිව් හෑන්ක්ගේ නවතම වාර්තාවට අනුව අවම දුක්ඛිත රට ලෙස නම් කර ඇත්තේ ස්විස්ටර්ලන්තයයි.